• 28 07 2022
    • 816 ნახვა
    ჰეპატიტის საერთაშორისო დღე

    ჰეპატიტის საერთაშორისო დღე

    ჰეპატიტი არის ღვიძლის ანთებითი დაავადება, რომელიც შეიძლება გამოიწვიოს ალკოჰოლის მოხმარებამ, ჯანმრთელობის სხვადასხვა სახის გართულებამ, ან მედიკამენტმა.
    თუმცა, ვირუსული ინფექციები ჰეპატიტის ყველაზე გავრცელებული მიზეზია.
    ჰეპატიტს ხშირად იწვევს ვირუსები – A, B, C, D და E.

    ჰეპატიტი A -ღვიძლის ვირუსული ანთების ყველაზე გავრცელებული ფორმაა, რომელსაც ხშირად ეპიდემიური ხასიათი აქვს. A ჰეპატიტი სხვადასხვა დროს ცნობილი იყო ინფექციური ჰეპატიტის, ეპიდემიური ჰეპატიტის, ბოტკინის დაავადების, სიყვითლის სახელწოდებით. სამედიცინო ლიტერატურაში იგი ჭუჭყიანი ხელების დაავადებადაც მოიხსენიება.
    ჰეპატიტი B- არის პოტენციურად სიცოცხლისათვის საშიში ღვიძლის ინფექცია, რომელიც გამოწვეულია B ჰეპატიტის ვირუსით. ის წარმოადგენს გლობალური ჯანმრთელობის ერთ-ერთ მთავარ პრობლემას. მას შეუძლია გამოიწვიოს როგორც მწვავე, ასევე ქრონიკული ინფექცია, რომელიც განაპირობებს ციროზითა და ღვიძლის კიბოთი სიკვდილიანობის მაღალ რისკს.

    ჰეპატიტი C – ღვიძლის დაავადებაა, რომელსაც იწვევს C ჰეპატიტის ვირუსი. იგი ძირითადად “ჩუმი” დაავადებაა და მიმდინარეობს ყოველგვარი კლინიკური სიმპტომის გარეშე.
    ჰეპატიტი D – არის იშვიათი ფორმა, რომელიც გვხვდება მხოლოდ B ჰეპატიტის ინფექციასთან ერთად. D ჰეპატიტის ვირუსი იწვევს ღვიძლის ანთებას, ისევე როგორც სხვა შტამები, თუმცა B ჰეპატიტის ინფექციის გარეშე ის ვერ წარმოიქმნება.
    ჰეპატიტი E არის წყლის დაავადება, რომელიც გამოწვეულია E ჰეპატიტის ვირუსის ზემოქმედებით. E ჰეპატიტი ძირითადად გვხვდება ცუდი სანიტარული პირობების მქონე ადგილებში და როგორც წესი, გამოწვეულია ფეკალური ნივთიერებების გადაყლაპვით, რომელიც აბინძურებს წყალმომარაგებას.